கோலாம்பூர், ஜூன் 23-
தாம் உதவிய சௌந்தர்யா எனும் மாணவி மருத்துவரானது குறித்து பெரும் மகிழ்ச்சியை வெளிப்படுத்தினார், மனிதவள அமைச்சர் ஸ்டீவன் சிம்.
இது தொடர்பில் பேஸ்புக்கில் பதிவிட்டுள்ள அவரது அறிக்கை பின்வருமாறு:-
சில ஆண்டுகளுக்கு முன், சௌந்தர்யாவிடமிருந்து ஒரு கடிதம் வந்தது. அவரது கல்விக் கட்டணத்தைச் செலுத்துவதற்கு அவசர உதவி தேவைப்பட்டது. காலக்கெடு நெருங்கிய நிலையில், கட்டணம் செலுத்தப்படாவிட்டால், இறுதி செமஸ்டர் தேர்வை எழுத முடியாமல் போயிருக்கும்.
பல ஆயிரம் ரிங்கிட் கடன் ஒரு பெரிய சுமையாக இருந்தது. சௌந்தர்யாவின் தந்தை, 60 வயதான ஒரு லாரி ஓட்டுநர், உடல் சோர்ந்திருந்தாலும், தன் மகள் மருத்துவராக வேண்டும் என்ற கனவை நிறைவேற்ற உறுதியாக இருந்தார். “நான் லாரி ஓட்டுநர், என் தந்தை ரப்பர் வெட்டுபவர், ஆனால் என் மகள் வாழ்க்கையில் வெற்றி பெற வேண்டும்,” என்று அவர் கூறினார்.
அவர்களது வீட்டிற்கு கல்விக் கட்டணத்தை செலுத்த உதவ சென்றபோது, அந்த உறுதியை உணர்ந்தேன். ஐந்து ஆண்டுகள் கடின உழைப்பு, வியர்வை, கண்ணீருக்கு பிறகு, இன்று சௌந்தர்யா டாக்டராக உயர்ந்துள்ளார்.
டாக்டர் சௌந்தர்யாவின் பட்டமளிப்பு விழாவிற்கு அவரது குடும்பத்தினரால் அழைக்கப்பட்டது எனக்கு பெருமையாக உள்ளது. அவர் பட்டம் பெற்றது மட்டுமல்ல, மூன்று முறை டீன் விருது பெற்று, சிறந்த மாணவி பதக்கமும் வென்றுள்ளார்.
அடுத்த வாரம், பினாங்கில் உள்ள ஒரு மருத்துவமனையில் டாக்டர் சௌந்தர்யா பணியைத் தொடங்கவுள்ளார். அவரிடம் நான் கூறினேன், “நான் எந்த பலனையும் எதிர்பார்க்கவில்லை. ஆனால், உன் பெற்றோரின் தியாகத்தை எப்போதும் நினைவில் வை. வெள்ளைக் கோட்டை அணியும்போது, தேவைப்படுபவர்களுக்கு உன் இதயத்துடன் உதவு. ஏழ்மையில் உள்ள நோயாளிகளை சந்திக்கும்போது, நீ படித்த சிறிய வாடகை அறையையும், இரவுகளில் துணையாக இருந்த ரொட்டி, மேகியையும் நினைவு கொள். அவர்களை அறிவுடன் மட்டுமல்ல, இதயத்துடனும் கவனி.”
டாக்டர் சௌந்தர்யாவுக்கு பணி வாழ்க்கையில் வாழ்த்துகள்! இந்த உலகிற்கு அறிவு மட்டுமல்ல, பெரிய இதயமும் கொண்ட மருத்துவர்கள் தேவை.
இவ்வாறாக, ஸ்டீவம் சிம் வலியுறுத்தியுள்ளார்.