துருக்கியின் அந்தால்யா நகரில் நவம்பர் 13ஆம் தேதி நடைபெற்ற COP31 தலைவர்கள் உச்சநிலை மாநாட்டின் நகர்ப்புற மீள்திறன், தகவமைப்பு மற்றும் காலநிலை நடவடிக்கைகள் தொடர்பான உயர்மட்டக் கலந்துரையாடலில் அவர் இவ்வாறு வலியுறுத்தினார்.
இந்தக் கலந்துரையாடலில் உலகத் தலைவர்கள் ஒன்றுகூடி, நகர்ப்புறங்களின் மீள்திறனை வலுப்படுத்துவதற்கும் காலநிலை நடவடிக்கைகளை விரைவுபடுத்துவதற்குமான வழிமுறைகள் குறித்து விவாதித்தனர்.
இதனிடையே, தேசிய அளவிலான காலநிலை இலக்குகளை மக்களின் வாழ்வில் நேரடியான மாற்றங்களாகக் கொண்டுவர வீடமைப்பு மற்றும் ஊராட்சித் துறை அமைச்சு மேற்கொண்டு வரும் முயற்சிகளையும் ங்கா கோர் மிங் எடுத்துரைத்தார்.
அவற்றில், பருவமழைக் கால திடீர் வெள்ளநீரை உறிஞ்சுவதுடன் பசுமையான பொது இடங்களாகவும் செயல்படும் பல்நோக்கு நீர் உறிஞ்சும் பூங்காக்களை உருவாக்குதல், சமூக வீடமைப்புத் திட்டங்களின் கூரைகளில் சூரியசக்தித் தகடுகளைப் பொருத்துதல் மற்றும் சுற்றுச்சூழலுக்கு உகந்த அம்சங்களை மேம்படுத்துதல் ஆகியவை அடங்கும்.
காலநிலை மாற்றத்தைத் தாங்கக்கூடிய சமூக வீடமைப்புத் திட்டங்கள், பாதிக்கப்படக்கூடிய மக்களைப் பாதுகாப்பதுடன், அவை உண்மையில் தேவைப்படுவோருக்கும் எளிதில் கிடைக்கக்கூடியதாக இருக்க வேண்டும் என்றும் அவர் வலியுறுத்தினார்.
“காலநிலை மாற்றத்தை எதிர்கொள்வதற்கான தகவமைப்பு நடவடிக்கைகள் செலவினம் அல்ல; அவை நமது உயிர்வாழ்வுக்கான அடிப்படைத் தேவை. வாக்குறுதிகள் நடைமுறையாகவும், கொள்கைகள் பாதுகாப்பாகவும், இலட்சியங்கள் செயல்பாடுகளாகவும் மாறும் உச்சநிலை மாநாடாக அந்தால்யா அமைய வேண்டும்,” என்று ங்கா கோர் மிங் தெரிவித்தார்.
உலகிற்கு இனி வெறும் பேச்சுகள் தேவையில்லை என்றும், பேரழிவுகளைத் தவிர்ப்பதற்கும், உடனடி நடவடிக்கைகளை விரைவுபடுத்துவதற்கும், நீடித்த நகர்ப்புற மாற்றத்தை ஏற்படுத்துவதற்கும் செயலில் இறங்க வேண்டியது அவசியம் என்றும் அவர் குறிப்பிட்டார்.
தேசிய அளவிலான காலநிலை உறுதிமொழிகளுக்கு உள்ளூர் நிலையில் உரிய நிதி ஒதுக்கீடும் செயலாக்க நடவடிக்கைகளும் உறுதிசெய்யப்பட வேண்டும் என்றும், அதன் மூலமே உலகளாவிய இலக்குகள் மக்களுக்கான உண்மையான பாதுகாப்பை வழங்க முடியும் என்றும் உலகத் தலைவர்களை அவர் கேட்டுக்கொண்டார்.