கோலாலம்பூர்:
போக்குவரத்து மற்றும் தளவாடத் துறைகளில் இருதரப்பு ஒத்துழைப்பை மேலும் வலுப்படுத்தும் வகையில் மலேசியாவும் சீனாவும் புரிந்துணர்வு ஒப்பந்தத்தில் கையெழுத்திட்டுள்ளன.
இரு நாடுகளுக்கும் இடையிலான ஒத்துழைப்புக்கான விரிவான கட்டமைப்பை இந்த ஒப்பந்தம் உருவாக்குகிறது. இதில் சாலைப் போக்குவரத்து, ரயில் போக்குவரத்து, கடல்வழிப் போக்குவரத்து, வான்வழிப் போக்குவரத்து மற்றும் தளவாடத் துறை ஆகியவை இடம்பெற்றுள்ளன.
இத்துறைகளில் இரு நாடுகளுக்கும் இடையே தொழில்நுட்ப நிபுணத்துவத்தைப் பரிமாறிக்கொள்வதற்கும், பணியாளர்களின் திறன்களை மேம்படுத்துவதற்கும் இந்த ஒப்பந்தம் வழிவகுக்கும் என்று போக்குவரத்து அமைச்சு தெரிவித்துள்ளது.
நுண்ணறிவைப் பயன்படுத்துதல்
மேலும், போக்குவரத்துத் துறையில் செயற்கை நுண்ணறிவைப் பயன்படுத்துதல், சுற்றுச்சூழலுக்கு உகந்த பசுமைப் போக்குவரத்தை மேம்படுத்துதல் மற்றும் குறைந்த கார்பன் உமிழ்வைக் கொண்ட உள்கட்டமைப்பை உருவாக்குதல் ஆகியவற்றுக்கும் முக்கியத்துவம் அளிக்கப்படவுள்ளது.
இதன் மூலம் போக்குவரத்து மற்றும் தளவாடத் துறைகளில் இரு நாடுகளுக்கும் இடையிலான அறிவு, தொழில்நுட்பம் மற்றும் நிபுணத்துவப் பரிமாற்றம் மேலும் வலுப்பெறும் என எதிர்பார்க்கப்படுகிறது.