கோலாலம்பூர், ஜூலை 16-
பிரதமர் டத்தோ ஸ்ரீ அன்வார் இப்ராஹிம் மலேசிய மக்களுக்காக “அசாதாரண அங்கீகாரம்” தொடர்பான மாபெரும் அறிவிப்பை விரைவில் வெளியிடவிருப்பதாக அறிவித்துள்ளார்.
இந்த அறிவிப்பு மக்களின் அன்றாட வாழ்க்கைப் பிரச்சனைகளுக்கு உண்மையான தீர்வு தருமா அல்லது வெறும் வாக்குறுதியாக முடியுமா என்ற கேள்வி மக்கள் மனதில் எழுகிறது.
பெட்ரோல் விலை குறைப்பு, அத்தியாவசியப் பொருட்களுக்கு மானியம், PTPTN கல்விக் கடன்கள் ரத்து, அல்லது விலைக் கட்டுப்பாடு போன்றவற்றை மக்கள் எதிர்பார்க்கின்றனர்.
“வாக்குறுதிகளால் மக்கள் சோர்ந்து போயிருக்கிறார்கள். இந்த அறிவிப்பு மக்களின் சமையலறைக்கு நேரடியாக உதவ வேண்டும்,” என் பாஸ் மத்திய செயற்குழு உறுப்பினரும், பெங்கலான் செப்பா நாடாளுமன்ற உறுப்பினருமான டத்தோ மார்சுக் ஷாரி வலியுறுத்தினார்.
வாழ்க்கைச் செலவு உயர்ந்து மக்கள் திணறுகின்றனர். இரவு சந்தையில் ஒரு சிறு கூடை பொருட்களுக்கு 100 ரிங்கிட் செலவாகிறது. மீன் வாங்குவதற்கு பதிலாக வேகவைத்த முட்டையைத் தேர்ந்தெடுக்க வேண்டிய நிலை உள்ளது.
வீட்டு வாடகை, மின்சாரக் கட்டணம், எரிபொருள் செலவு உயர்ந்து, சம்பளம் உயராத நிலையில், மக்கள் அன்றாட செலவுகளை சமாளிக்க முடியாமல் உள்ளனர்.
PTPTN கல்விக் கடன்கள் இளைஞர்களுக்கு பெரும் அழுத்தமாக உள்ளன. வேலைக்கு சேர்ந்தவுடன் கடன் செலுத்த வேண்டிய நிர்ப்பந்தம் வருகிறது. வாழ்க்கையைத் தொடங்குவதற்கு முன்பே நீதிமன்ற உத்தரவு வருகிறது.
தேர்தல் வாக்குறுதிகளில் கடன்கள் ரத்து செய்யப்படும் என அறிவிக்கப்பட்ட போதிலும், முன்னேற்றம் இல்லை. B40 குழுவினரின் கடன்களை ரத்து செய்தால், இளைஞர்களுக்கு நம்பிக்கை பிறக்கும்.
“நான் பிரதமரானால், நாளை எரிபொருள் விலை குறையும்,” என்று அன்வார் முன்பு கூறியது மக்கள் நினைவில் உள்ளது. ஆனால், RON95 விலை RM2.05-இல் உள்ளது, டீசல் விலை உயர்ந்து விட்டது. மின்சாரக் கட்டணமும் இந்த ஜூலை மாதம் உயர்ந்துள்ளது. “ICPT இப்போது AFA ஆக மாறி, கட்டணங்கள் உயர்கின்றன. மக்களுக்கு புரிவது ஒன்றே: செலவு அதிகரித்து விட்டது,” என்கிறார் டத்தோ மார்சுக்.
சட்ட விவகாரங்களில் மக்கள் நியாயத்தை எதிர்பார்க்கின்றனர். “செல்வாக்குமிக்கவர்களின் வழக்குகள் காணாமல் போகின்றன, ஆனால் சாமானியர்கள் மீது வழக்குகள் தொடர்கின்றன. இது சட்டத்தில் இரு வேறு அணுகுமுறைகளை உணர வைக்கிறது,” என்கிறார் டத்தோ மார்சுக்.
தலைமை நீதிபதி பதவி காலியாக இருப்பதும், அரசு வழக்கறிஞர் துறையை பிரிக்கும் வாக்குறுதி நிறைவேறாததும் மக்களிடையே அவநம்பிக்கையை ஏற்படுத்துகிறது.
“இந்த அறிவிப்பு மக்களின் உண்மையான தேவைகளைப் பூர்த்தி செய்தால், அரசு பாராட்டப்படும். இல்லையெனில், ‘அன்வார் வெளியேறு’ என்ற ஹேஷ்டாக் சமூக ஊடகங்களில் வைரலாகலாம்,” என டத்தோ மார்சுக் ஷாரி எச்சரிக்கிறார்.
