ஆயர் தாவார், ஜன. 14-
கோல்டன் எம்பையர் மீடியா மலேசியாவின் தலைவர் மஹேந்திரன் நடராஜா தலைமையில் தமிழ்ப்பள்ளி மாணவர்களுக்கு முதன் முறையாக அடிப்படை புகைப்படக்கலை மற்றும் ட்ரோன் காணொளி காட்சியமைப்பு பயிற்சி வழங்கப்பட்டது.
பேராக், ஆயர் தாவாரில் அமைந்துள்ள கேஷ்வூட் தோட்டத் தமிழ்ப்பள்ளியில் கடந்த 12ஆம் தேதி காலை 8 மணிக்குத் தொடங்கிய இந்த பயிற்சியில், 25 தமிழ்ப் பள்ளி மாணவர்கள் ஆர்வத்துடன் பங்கேற்று பயிற்சியில் முழுமையாக ஈடுப்பட்டனர்.
இந்நிகழ்ச்சியை சிறப்பிக்க கேஷ்வூட் தோட்டத் தமிழ்ப்பள்ளியின் தலைமை ஆசிரியர் திருமதி யசோதா நாராயணசாமி மற்றும் மஞ்சோங் மாவட்ட கல்வி இலாகாவின் தகவல்தொடர்பு தொழில்நுட்ப துணை அதிகாரி திருமதி பரிமளா வடிவேலு ஆகியோர் வருகை புரிந்து மிகுந்த ஆதரவளித்தனர்.
கோல்டன் எம்பையர் மீடியா மலேசியா நிறுவனம் ஏற்பாடு செய்த இந்த முயற்சியானது, மாணவர்களின் சுறுசுறுப்பையும் கற்பனை திறனையும் ஊக்குவித்து புகைப்படக் கலை மற்றும் ட்ரோன் காணொளி காட்சியமைப்பு போன்ற நவீன திறன்களை வளர்க்கும் நோக்கில் நடைபெற்றது. இது மாணவர்களின் எதிர்கால தொழில்முனைப்பு ஆற்றலை உருவாக்குவதற்கான வழிகாட்டல் ஆகும்.
இந்த நிகழ்ச்சியை வெற்றிகரமாக்க உதவிய அனைவருக்கும் ஏற்பாட்டுக் குழுவினர் நன்றியைத் தெரிவித்துக் கொண்டனர்.
