கோலாலம்பூர் அக் 18-
வெளிநாட்டுத் தொழிலாளர்களை ஈடுபடுத்துவதற்காக நிர்ணயிக்கப்பட்ட நிபந்தனைகள், பணியாளர் குடியிருப்புகள் மற்றும் தொழிலாளர்களின் நலன் தொடர்பான பிற விஷயங்கள் போன்றவற்றுக்கு முதலாளிகள் இணங்கும் நிலை இன்னும் திருப்திகரமான அளவில் இல்லை என்று உள்துறை அமைச்சர் டத்தோஸ்ரீ சைபுடின் நசுத்தியோன் இஸ்மாயில் இன்று சுட்டிக் காட்டினார்.
கோவிட் -19 தொற்றுநோய்களின் எளிமையைத் தொடர்ந்து முதலாளிகள் அந்தந்த தொழில்களில் வெளிநாட்டு ஊழியர்களை ஈடுபடுத்த உதவுவதற்கு அரசாங்கம் தனது பங்கைச் செய்திருக்கிறது.
இதனைக் கருத்தில் கொண்டு, இது தொடர்பான அனைத்து விதிமுறைகளுக்கும் இணங்க முதலாளிகள் தங்கள் பங்கைச் செய்ய வேண்டும் என்று அவர் கேட்டுக் கொண்டார்.
நிபந்தனைகளை நிறைவேற்றத் தவறும் பட்சத்தில் முதலாளிமார்கள் அதிகாரிகளால் விசாரிக்கப்படுவார்கள்.மேலும் ஏதேனும் விதிகளை மீறியதாகக் கண்டறியப்பட்டால் நீதிமன்ற நடவடிக்கையையும் இவர்கள் எதிர்கொள்ள நேரிடும் என்றார்.
அந்நியத் தொழிலாளர்கள் விவகாரம் தொடர்பில் மனிதவள அமைச்சு மற்றும் உள்துறை அமைச்சு இடையிலான கூட்டுக் குழுக் கூட்டத்திற்கு பின்னர் நடைபெற்ற ஊடகவியலாளர் சந்திப்பில் அவர் இதனை தெரிவித்தார்.
மனிதவள அமைச்சர் வ சிவகுமாரும் இந்த சந்திப்பில் கலந்து கொண்டார் என்பது குறிப்பிடத்தக்கது.
கடந்த அக்டோபர் 9 ஆம் தேதி வரை மொத்தம் 667,418 வெளிநாட்டுத் தொழிலாளர்கள் மலேசியாவில் தற்காலிக வேலை அனுமதியில் தங்கியிருப்பதாக அவர் கூறினார்.
வேலை வாய்ப்புத் தளர்வுத் திட்டம் மற்றும் தொழிலாளர்களின் மறுசீரமைப்புத் திட்டம் 2.0 கீழ்
அரசாங்கம் வெளிநாட்டுத் தொழிலாளர்களை வேலைக்கு அமர்த்தி கொள்ள அனுமதி வழங்கியுள்ளது என்று அவர் சொன்னார்.
முடிதிருத்தும் நிலையங்கள், நகைக் கடைகள் மற்றும் ஜவுளி ஆகிய இந்திய பாரம்பரிய தொழில் துறைகள் இப்போது அந்நியத் தொழிலாளர்களை வேலைக்கு அமர்த்த விண்ணப்பம் செய்து கொள்ள அனுமதி வழங்கப்பட்டுள்ளது என்றார்.
