சென்னை, ஜூன் 23-
தளபதி விஜய் நடித்துள்ள ‘ஜனநாயகன்’ திரைப்படம், அவரது இறுதி திரைப்படமாக இருக்கலாம் என ரசிகர்கள் மத்தியில் பெரும் எதிர்பார்ப்பு நிலவுகிறது.
அரசியல் களத்தில் பயணத்தைத் தொடங்கியுள்ள விஜய்யின் இந்தப் படத்திற்காக ரசிகர்கள் ஆவலுடன் காத்திருக்கின்றனர். இந்நிலையில், படத்தின் ஒரு காணொளி பகுதி, விஜய்யின் பிறந்தநாள் பரிசாக வெளியிடப்பட்டது.
இப்படத்தில் முக்கிய கதாபாத்திரத்தில் நடித்துள்ள நடிகை மமீதா பைஜூ, அளித்த பேட்டி ஒன்றில் ‘ஜனநாயகன்’ படத்தைப் பற்றி உணர்ச்சி பொங்கப் பேசினார். குறிப்பாக, படப்பிடிப்பின் இறுதி நாள் மிகவும் உணர்வுப்பூர்வமாக இருந்ததாக அவர் தெரிவித்தார்.
“நான் விஜய் சாரிடம், ‘ஜனநாயகன் உங்களின் கடைசி திரைப்படமா?’ எனக் கேட்டேன். அதற்கு அவர், ‘தற்போது தெரியவில்லை, தேர்தல் முடிவுகளைப் பொறுத்தே முடிவு தெரியும்’ எனப் பதிலளித்தார்.
படப்பிடிப்பின் இறுதிக் கட்டத்தில் நாங்கள் அனைவரும் மிகவும் உணர்ச்சிவசப்பட்டோம். விஜய் சாரின் கடைசி நாள் படப்பிடிப்பு முடிந்ததும், அவருடன் புகைப்படம் எடுத்தபோது, நானும் சுற்றியிருந்தவர்களும் உணர்ச்சி மேலிடத்தால் கலங்கினோம்.
அந்த நேரத்தில் விஜய் சாரும் உணர்வுப்பூர்வமாக இருந்தார்,” என மமீதா பைஜூ உருக்கமாகக் கூறினார்.
‘ஜனநாயகன்’ திரைப்படம் விஜய்யின் திரையுலகப் பயணத்தில் ஒரு முக்கிய மைல்கல்லாக அமையும் என்பதில் சந்தேகமில்லை. இந்தப் படத்தின் வெளியீட்டை ரசிகர்கள் ஆவலுடன் எதிர்நோக்கி உள்ளனர்.