கோலாலம்பூர்:
டிஏபி மூத்த தலைவர்களான லிம் குவான் எங் மற்றும் லிம் கிட் சியாங் ஆகியோருக்கு எதிராக SME Corp மலேசியா தலைவர் டெங் சாங் கிம் தனிப்பட்ட தாக்குதல்களை நடத்தியதாகக் கூறப்படும் விவகாரத்தில், தொழில்முனைவோர் மற்றும் கூட்டுறவு மேம்பாட்டுத் துறை அமைச்சர் ஸ்டீவன் சிம் பொறுப்பேற்று, தனது நிலைப்பாட்டை வெளிப்படையாகத் தெளிவுபடுத்த வேண்டும் என கிள்ளான் நாடாளுமன்ற உறுப்பினர் கணபதிராவ் வீரமான் வலியுறுத்தியுள்ளார்.
டெங் சாங் கிம்மை கடந்த 2026 மே 18ஆம் தேதி பதவிக்கு நியமித்த அமைச்சர் ஸ்டீவன் சிம், தனது அமைச்சின் கீழ் இயங்கும் ஓர் அமைப்பின் தலைவர், டிஏபி மூத்த தலைவர்களுக்கு எதிராகத் தனிப்பட்ட தாக்குதல்களில் ஈடுபடுவதாகக் கூறப்படும் நிலையில் மௌனம் காக்கக் கூடாது என அவர் தெரிவித்துள்ளார்.
மாதாந்திர குறைந்தபட்ச ஊதியத்தை RM300 உயர்த்துவது மற்றும் வெளிநாட்டுத் தொழிலாளர்களுக்கு கட்டாயமாக 2% EPF பங்களிப்பை அறிமுகப்படுத்துவது தொடர்பான கொள்கை வேறுபாடுகள், உண்மைகள் மற்றும் நியாயமான வாதங்களின் அடிப்படையில் விவாதிக்கப்பட வேண்டும். மாறாக, தனிப்பட்ட தாக்குதல்களுக்கு இடமளிக்கக் கூடாது என கணபதிராவ் குறிப்பிட்டுள்ளார்.
இந்தக் கொள்கைகள் சிறு மற்றும் நடுத்தரத் தொழில்முனைவோர் (SME), முதலாளிகள் மற்றும் ஏற்கெனவே பணியாற்றும் வெளிநாட்டுத் தொழிலாளர்கள் மீது ஏற்படுத்தக்கூடிய தாக்கங்கள் தீவிரமாகப் பரிசீலிக்கப்பட வேண்டும் என்பதே தனது நிலைப்பாடு என்றும் அவர் கூறியுள்ளார்.
தொழிலாளர்களின் நலனைப் பாதுகாப்பதுடன், சிறு மற்றும் நடுத்தர நிறுவனங்களின் போட்டித்திறனையும் நீடித்த வளர்ச்சியையும் உறுதிப்படுத்துவது அவசியம் என்றும் அவர் வலியுறுத்தியுள்ளார்.
லிம் குவான் எங்கின் கொள்கை நிலைப்பாட்டுடன் ஸ்டீவன் சிம் உடன்படாமல் இருக்கலாம். இருப்பினும், கொள்கை வேறுபாடுகள் லிம் கிட் சியாங் உள்ளிட்ட டிஏபி தலைவர்களுக்கு எதிரான தனிப்பட்ட தாக்குதல்களுக்கான தளமாக மாறுவதை அவர் அனுமதிக்கக் கூடாது என கணபதிராவ் தெரிவித்துள்ளார்.
SME நிறுவனங்கள், தொழிலாளர்கள் மற்றும் நாட்டின் நலன்களுக்கு முன்னுரிமை அளிக்கும் அமைச்சரையே பொதுமக்கள் எதிர்பார்ப்பதாகக் குறிப்பிட்ட அவர், அரசியல் பகைமை காரணமாக முக்கியமான கொள்கை விவாதங்கள் திசைதிருப்பப்படக் கூடாது என்றும் தெரிவித்துள்ளார்.
பொறுப்புணர்வை வெளிப்படுத்தும் வகையில் அமைச்சர் ஸ்டீவன் சிம் இந்த விவகாரத்தில் வெளிப்படையாகப் பேச வேண்டும்.
பொறுப்புக் கேட்கப்படும் சூழலில் மௌனமாக இருப்பது ஏற்றுக்கொள்ள முடியாதது என கணபதிராவ் தனது அறிக்கையில் வலியுறுத்தியுள்ளார்.
