கோலாலம்பூர் நவ 29-
மொனாக்கோ தனது கெளரவ தூதரக அலுவலகத்தை இங்கு திறக்கவிருப்பதன் அடிப்படையில் எதிர்காலத்தில் இரு நாடுகளும் பயனடையும் வகையில் மலேசியாவுடன் ஒத்துழைக்க தயாராக உள்ளது.
சுற்றுலாத் தொழில், கல்வி மற்றும் நிலையான வளர்ச்சி போன்ற பொதுவான நலன்கள் குறித்து இரு நாடுகளும் ஆராய பல வாய்ப்புகள் உள்ளன என்று இளவரசர் ஆல்பர்ட் II கூறினார்.
இரு நாடுகளின் இளைஞர்களிடையே கலாச்சார பரிமாற்றங்கள் மற்றும் கல்வி வாய்ப்புகளுக்கும் இது வழி வகுக்கும் என்று தெரிவிக்கப்பட்டது.
“எனவே, இந்த விஷயத்தை நாம் இன்னும் ஆழமாக ஆராய்ந்து இரு நாடுகளுக்கும் பயனளிக்கும் ஒத்துழைப்பை ஏற்படுத்துவதற்கான சிறந்த வழியை அடையாளம் காண வேண்டும்,” என்று அவர் பெர்னாமாவுக்கு அளித்த பிரத்தியேக பேட்டியில் குறிப்பிட்டார்.
மலேசியாவுக்கு அதிகாரப்பூர்வ வருகையை மேற்கொண்டிருக்கும் இளவரசர் ஆல்பர்ட்டுடன் உடன் செல்லும் பொறுப்பை மனிதவள அமைச்சர் சிவகுமார் ஏற்றுக் கொண்டார்.
