புக்கிட் அமான்:
ஐஜிபி காலிட் இஸ்மாயில் தங்களிடமிருந்து மனுவையும் மகள் பிரசன்னா திக்ஷாவின் பொம்மையையும் பெற்றுக் கொள்ளும் வரை புக்கிட் அமான் போலீஸ் தலைமை அலுவலகத்தின் முன் காத்திருக்கப் போவதாக தாயார் இந்திரா காந்தி திட்டவட்டமாகக் கூறினார்.
இந்திரா காந்தியின் ஆதரவாளர்கள் இன்று பிற்பகல் 1 மணி முதல் ஐஜிபி காலிட் இஸ்மாயிலைச் சந்திக்க காத்திருந்தனர்.
இந்நிலையில் ஐஜிபி அவர்களை சந்திக்க வராததால், 2.30 மணியளவில் அவர்கள் சாலையில் அமர்ந்து போராட்டத்தைத் தொடங்கினர்.
நாங்கள் இவ்வளவு தூரம் வந்திருக்கிறோம். இந்த அமைதி போராட்டம் இறுதியில் கைது நடவடிக்கையில் முடிந்தாலும் அது குறித்துத் தங்களுக்குக் கவலை இல்லை என்று இந்திரா காந்தி தரப்பு வழக்கறிஞர் அருண் துரையசாமி கூறினார்.
கலித், புத்ராஜயா இன்டர்நேஷனல் கன்வென்ஷன் சென்டரில் நடந்த ஒரு நிகழ்ச்சியிலிருந்து வெளியேறி இங்கு வருவதாகத் தகவல் கிடைத்ததாகவும் அவர் தெரிவித்தார்.
100-க்கு மேற்பட்டோர் இன்று சோகோ ஷாப்பிங் காம்ப்ளெக்ஸிலிருந்து புகிட் அமான் வரை அமைதி போராட்டத்தை முன்னெடுத்தனர்.
இந்திராவின் முன்னாள் கணவர் ரிதுவான் அப்துல்லா, 2018ஆம் ஆண்டிலிருந்து காவல்துறையால் தேடப்படும் நபர். அவர், குழந்தைகளின் தனிப்பட்ட மதமாற்றம் மற்றும் காவல் உரிமை தொடர்பான நீதிமன்ற உத்தரவை மதிக்காமல், பிரசன்னாவைத் திருப்பிக் கொடுக்க மறுத்ததாக குற்றஞ்சாட்டப்பட்டுள்ளார்.
2018 ஜனவரி 29-ஆம் தேதி, கூட்டரசு நீதிமன்றம் ஒருதலைப்பட்ச மதமாற்றம் செல்லாது என்று தீர்ப்பளித்தது. மேலும், ரிதுவானைக் கைது செய்து பிரசன்னாவை இந்திராவிடம் ஒப்படைக்க ஐஜிபி-க்கு உத்தரவிட்டது.
ஒரு பொம்மையைப் பெறுவதற்கே ஐஜிபி தயங்குவது மிகவும் அவமானமாக உள்ளது. இதற்காகவே முன்பே நாங்கள் அவருக்குக் கடிதம் எழுதியிருந்தோம். அவர் வேலையாக இருக்கிறார் என்கிறார்கள். இஃது அவர் வேலையின் ஒரு பகுதியாக இல்லையா? என்று அருண் துரையசாமி கேள்வி எழுப்பினார்.


