பெட்டாலிங் ஜெயா, ஜூன் 10-
1998ஆம் ஆண்டில் பிரதமராக இருந்த துன் டாக்டர் மகாதீர் முகமட்டுக்கு எதிராக மூண்ட மக்களி எழுச்சி மீண்டும் எழ வாய்ப்பில்லை என ஜசெகவின் மூத்த தலைவரான லிம் கிட் சியாங் குறிப்பிட்டுள்ளார். டாக்டர் மகாதீர் பிரதமராகவும் டத்தோஸ்ரீ அன்வார் இப்ராகிம் துணைப் பிரதமராகவும் இருந்தபோது நிகழ்ந்த மக்கள் அந்தப் போராட்டம் மீண்டும் நிகழாது என தாம் தீர்க்கமாக நம்புவதாக அவ தெரிவித்தார். கடந்த 20 ஆண்டுகளில்தான் எத்தனை மாற்றங்கள். அத்தனையும் நல்லதுக்கென்றே தோன்றுகிறது.
எல்லோருமே மாறி இருக்கிறோம். துன் மகாதீர், டத்தோஸ்ரீ அன்வார், பக்காத்தான் ஹராப்பான் தலைவர்கள் எல்லாருமே சிறந்த மலேசியத் தலைவர்களாக விளங்க நல்ல மனிதர்களாக இருத்தல் அவசியம் என்ற வாழ்க்கைப் பாடத்தை உணர்ந்து கொண்டிருக்கிறார்கள், என மலேசியன் இன்சைட் நேர்காணலில் லிம் குறிப்பிட்டார்.
டாக்டர் மகாதீர் பிரதமராக இருப்பதாலும் அவருக்குப் பின் அன்வார் அப்பதவியை ஏற்பார் என்பதாலும் 1998ஆம் ஆண்டு எழுச்சி மீண்டும் நிகழும் சாத்தியம் உண்டா என்று வினவப்பட்டதற்கு லிம் அவ்வாறு பதிலளித்தார்.
அம்னோவில் பிரதமராகவும் துணைப் பிரதமராகவும் இருந்தபோதுகூட, வெளிப்பார்வைக்கு ஒத்துழைப்பதுபோல் காணப்பட்டாலும் டாக்டர் மகாதீருக்கும் அன்வாருக்குமிடையில் உள்ளுக்குள் பிரச்னைகள் கனன்று கொண்டிருந்தன. பின்னர் ஒரு நாளில் அது கடும் மோதலாக வெளிப்பட்டு அன்வார் பதவி நீக்கம் செய்யப்பட்டு சிறைக்கு அனுப்பப்பட்டார்.
இப்போது பக்காத்தான் ஹராப்பானில் எல்லாமே நன்றாகவே உள்ளன என்று இருவருமே கூறிக் கொண்டிருந்தாலும் கடந்த கால மனக் கசப்புகளை வைத்துப் பார்க்கும்போது டாட்டர் மகாதீர் அவ்வளவு எளிதில் அன்வாருக்கு இடத்தை விட்டுக் கொடுப்பாரா என்ற ஐயப்பாடு எழாமலில்லை.
அண்மையில் சினார் ஹரியானுக்கு வழங்கிய நேர்காணலில் கூட நாட்டின் எட்டாவது பிரதமர் அன்வார் இப்ராகிம்தான் என்பதை மகாதீர் வலியுறுத்தி இருந்தது குறிப்பிடத்தக்கது. இப்போது இருப்பவர் பழைய மகாதீர் அல்ல என்று லிம் திடமாக நம்புகிறார்.
இன்றைய மகாதீர் 1981 தொடங்கி 2003 வரை 22 ஆண்டுகள் பிரதமராக இருந்த அந்த மகாதீரிலிருந்து மாறுபட்டவர் என அவர் குறிப்பிட்டார். மற்றவர்கள்மீது தம் கருத்து திணிப்பவராக இருந்த நிலைமாறி ஒருமித்த கருத்தை உருவாக்க முயல்பவராக உருவாகியுள்ளார். மகாதிர் மற்றும் ஹரப்பானின்கீழ் மலேசியா நல்லவர்களின் கைகளில் உள்ளதாகவே நம்புகிறேன், என்று லிம் கூறினார்.